pinonot koy malet mon lakes

malikeliketak lan nalilinggis taka
lalo la no walay imis mon milmila
natalusan kon anggapoy malaelaem
iran pankanawnawam ed sanngarem
ya mituyaw er siyak, andi bali la
masarag lay nengneng mo tan gana

diyar leleg na panalagar koy iyepay
bagyon beyewbeyew, marakel so oras
kon mumutekteken iray bektan lawas
samit daray ugalim agko nipulisay
ya mangidederew na magter a ligliwa
ya anggan kapigan agak balot unsawa

saray lakes mon malet ilalok ya unsabi
piyan nabiyer irayay ermen ya agpalabi
ya kukurkuren toy pagew kon mikakasi
itdan koy imano ta piyan walay linak
danganan kod labi, mangitarok na kugip
piyan diyad ibutay na balon agew akaimisak

101809 witwit moy bulawit

terter kad lupak ya mannangis
teneb moy laman kon marungis
itarok moak agos ya mabiskeg
punasen moak no sikatoy nepeg
ta say kesaw ko et manan-ando
anggapon balot so mangi-imano

nagngel koy billit elekan dak
basyuen ko komon; naksawanak
inyurong kod pitek; ambetel
amagaay teeko singaak atikel
intangay kod tawen; mikerew
panangasin makaluwag na pagew

saray ula-ulak agda nagngel
aliknak anges ko lay nagetel
ginuyurak na aralem ya ugip
alimatan koy nangis tan kugip
aliknak so aping kon asasnit
atakiling koy awit mon bulawit

092909 punasen toy pannangis

ambetebetelay sibok na dagem
atagey laray kumpol na lurem
dakela sibersiber iran andirit
mamanok mankakaykayed paritpit
balitok laray daway kapageyan
malinlinak so agos na angalakan

inpelag koy bulong laktip toy kerew
awiten tod sikan mamasibeg na pagew
nakneb balet agton balot timmapew
inyesaes kor dagem liingen toy pusom
balet naalawat na alimbusabos naukom
mairap manaya singaak unlabot er dagum

anggaman untan wala ni ray ilalo
ya diyad pagew kon naynay amamayo
ya no untayagtag lay agew ed bukig
narengel ko lay pekpek daray tabig
ed angalakan, nanonotan koray imis
mon alay samit, linget mon ungugulis
er pagew mo, punasen toy pannangis

090109 erel moy kaunuran ya imis ko

agmoak manaya natepelan
ya ilingwan anggan kabekta
iner lara may linglinggis
daray malugon matam
iner laray samit na balikas
ya inbulos na dilam

antak walaak nid pagew mo
anggan inbesngaw moy lingwan
matuwa natalusan taka inaro
nanlapu nen sikay angikaindan
akin balet et inbaybayag mon
mansasagabay iliw tan ermen

wadiyaak ya manalagar er sika
ya mangakod saratan ya likna
kayepkepan toy parok na beleng
pabuselen toy liket tan imeng
singa nen wala ta nid kalangweran
naynay sika tan duay mansasalaran

kunwari kani ... uhmmmm

agak makainges ed masyadon paga
inyukom pepet moy bibil mo batika
antoy nibesngaw kon asakitan ka
aabuten taka balet akalugan kala
nilak so abong yo et anggapo ka
nanalagarak ya abayag anggan labi
amagaay mulagat ko agka simmabi

akaugipak ed dulang ya mannononot
antak bimmarong kan sikay unaamot
aliingan kon walay ules kon maimeng
danganan ya samyoy balibalid eleng
agabayag apasikmatan takan unlelepsag
say ganam sisinagay marmarlang ya hasag
aliknak, petang na aplos moy makapabesag

"kunwari kani, uhmmm" inkuan mon inkarot
anengneng koy matam mansiyayap, mamapasnok
ipupulisay koy limam; singa alamad sikop
inanguban taka, indeedeen mon ag-akasemek
naikbanan moy hasag say salming toy atemek
natan wadiya tan dua mareereen ed bilunget
nalmay so paspasnok mon unbabawid kawewet

081409 asakbay ya tuno

(sikatoya may patalus na anlong
ya "nasapa a samiweng"

SINSINEK itetelmer toy kareenan
igagayugoy toy maermen ya kaparukan
natatayeketekay terter na luluwa
pinepet toy bibil to, komon mansalita
balet apaabetay lakap tan angub
nanpauli'y imis, nanbusel so ilalo


"kapigan kalad tan inaro" inkuan to
"abayag la inaro ya babantayan ta ka"
malet ya gemgem ed takeb ko, aliknak
masamita esaes tetepetan to ak
on met lan on so inasigtak ya inye-ebat
karotkaroten to ak no aliway imis ko
ansakit ya unagasang balet itetepel ko


nanak-akar kami babansagan mi tugtug
sayaw na hindi, maligliga manbagtog
angngad manbaybayes iray lawis mi
angub-anguban koy aping to kalamor
manel-elek, kinkindatan ko, NALILIKETAN

081409 nasapa a samiweng

SASAINNEK immamegna’t ulimek
inguyguyud nat malmalday a bitek
maar-arbisan luluwa nga agtedtedted
inapput nat bibig na, agsarita koma
ngem rakep ken agek met nasungad na
nangparnuay isem, nagsaringit namnama

“kaatno kapay dita dungngo” kinunana
“nabayagen dungngo a buybuyaen ka”
nailet a petpet tay takyag ko, nariknak
nasam-it nga ar-arasaas salsaludsudennak
wen met la wen ti inpan ko sungsungbat
kuddokuddotennak no madit isem ko
nasakit nga sumanaang ngem iturtured ko

nagnagna kami kumkumpasan mit ayug
sala dagiti hindi, naal-aligaga agkanabtuog
aginggana agin-indayog dagiti siksiketmi
agsalsala kami, agpinpinerreng kami
agek-agekak man tay pingping na piman
agkakararungiit, kiddakiddayak, MAAY-AYATAN

***
ala! kapadak nga ilokano agbasa kayo latta
nadiyos unay ti agngina.md